تعليم الطبخ للمبتدئين بأسهل الطرق

\ الارز بالشعيريه

المقادير:

كوب ارز

ربع كوب شعيريه

كوب ماء

معلقة سمنة او زيت

الطريقة:

نجيب السمنة او الزيت ونسخنهم وبعدين نحط بعدها الشعيريه لحد مالونها يبقى ذهبى وبعدين نحط عليهم المياه لحد ماتغلى وبعدين نحط عليهم الرز واول ماالمياه تغلى والميه تقل على وش الرز نوطى خالص النار علشان يتردد

وبس


\ الارز الابيض "ارز السمك المشوى"

المقادير:

ا كوب ارض ابيض
1 كوب ماء
معلقة صغيرة ممسوحة ملح
2 معلقة زيت

الطريقه:

نسخن الزيت فى الحله

نضيف المياه على الزيت بعد ماسخن ......ونحط عليه الملح ونسيبه يغلى.....ونكون غسلنا الرز ....وصفيناه....ونضيف الرز للمياه بعد ماتغلى واول ماالرز يشرب المياه نوطى عليه النار يتردد لحد مايستوى


وبالهنا والشفا

\ الارز الاحمر"ارز السمك المقلى"

المقادير/

1 كوب ارز
بصله صغيره
معلقة صغيرة ممسوحه ملح
طماطميه
1 كوب ماء
2 معلقة زيت

الطريقه:

نقطع البصله حتت صغيرة او نبشرها ونحمرها فى الزيت لحد مايكون لونها ذهبى فاتح وبعدين نكب عليه المياه والملح ونسبهم يغلوا وبعدين نحط عليهم الرز ونكون قطعنا الطماطم 4 قطع ونسبهم يغلوا واول ما المياه تقل على الرز نوطى النار خالص ونسيبه يتردد

وبالهنا والشفاء

\ الارز المعمر المصرى

بطريقتى انا بس رائع بجد

المقادير:

2 كوب ارز ابيض
2 كوب لبن
1 كوب شوربه
معلقه كبيرة ممسوحه ملح
2 معلقة قشطة
1 كوب زبادى"وده السر"
1 معلقة سمن بلدى

1/2 فرخة مسلوقة نص سوا


الطريقة:

نغلى اللبن مع الشوربه ونحطلهم الملح ونطفى عليهم....وبعدين نغسل الارز....ونحط نص الارز فى الطاجن...وبعدين الفراخ..وبعدين نحط باقى الارز على الفراخ.... ونضيف عليهم اللبن والشوربه ....ونحط عليهم معلقة قشطة...و1/2معلقة السمنه......ونسيبه فيه كده 1/2 ساعه ...طبعا مش على على النار

وبعدين ناخدهم وندخلهم الفرن ...واول مايبدا يغلى نوطى الفرن علشان يتردد

نكون بقى احنا برة فى كوب كبير حطينا كوب الزبادى على معلقة القشطة الباقيه ونص معلقة السمنه البلدى ونضربهم كده بالشوكه ولما نلاقى الارز استوى نحط على وشة الكوبايه اللى عملناها الزبادى بالقشطة ونشغل الشوايه علشان وشه يحمر

وبالهنا والشفا